काठमाडौं। संघीय संसदअन्तर्गत आज विभिन्न छ वटा संसदीय समितिको बैठक बस्दै छ।
बुधबार अर्थ समिति, उद्योग तथा वाणिज्य र श्रम तथा उपभोक्ता हित समिति, कानुन, न्याय तथा मानव अधिकार समिति, कृषि, सहकारी तथा प्राकृतिक स्रोत समिति, सार्वजनिक नीति तथा प्रत्यायोजित विधायन समिति र सङ्घीयता सबलीकरण तथा राष्ट्रिय सरोकार समितिको बैठक बस्न लागेको हो।
बिहान १० बजे बस्ने अर्थ समितिको बैठकमा ‘नेपाल राष्ट्र बैंक ऐन, २०५८ लाई संशोधन गर्न बनेको विधेयक’माथि दफावार छलफल हुने कार्यसूची रहेको छ।
सोही समय (बिहान १० बजे) बस्ने उद्योग तथा वाणिज्य र श्रम तथा उपभोक्ता हित समितिको बैठकमा वैदेशिक रोजगार व्यवस्थापनका विविध विषयमा छलफल गरिनेछ।
यस्तै, बिहान ९:३० बजे बस्ने कानुन, न्याय तथा मानव अधिकार समितिको बैठकमा स्वतन्त्र न्यायपालिका तथा न्याय प्रशासनको वर्तमान अवस्था, विद्यमान समस्या र तिनको समाधानबारे छलफल हुनेछ।
बिहान ९:३० बजे नै बस्ने सार्वजनिक नीति तथा प्रत्यायोजित विधायन समितिको बैठकमा युनेस्को र पुरातत्त्व विभागसँग विश्व सम्पदा सूचीमा सूचीकृत हुन सक्ने नेपालका सम्भावित सम्पदाहरूबारे छलफल गर्ने कार्यसूची तय गरिएको छ।
यसैगरी, कृषि तथा प्राकृतिक स्रोत समितिको बैठकमा समितिमा परेका विभिन्न उजुरीहरूका सम्बन्धमा आन्तरिक छलफल हुनेछ।
बिहान ११ बजे बस्ने संघीयता सबलीकरण तथा राष्ट्रिय सरोकार समितिको बैठकमा भने दैनिक उपभोग्य तथा अत्यावश्यक वस्तु र सेवाको आपूर्ति एवं वितरण, मूल्य नियन्त्रण, गुणस्तर कायम, बजार अनुगमन तथा उपभोक्ता हक संरक्षण र प्रवर्धनका विषयमा गहन छलफल हुने जनाइएको छ।
