काठमाडौं। प्रतिनिधिसभा बैठकमा सांसद गोपाल शर्माले सरकारले गरेको “दिन गनेर होइन, सेकेन्डमा काम गर्छु” भन्ने दाबीमाथि प्रश्न उठाउँदै जनताले प्रत्यक्ष अनुभूति गर्ने काम कहिले हुने हो भनेर सरकारसँग जवाफ मागेका छन्।
संसदमा बोल्दै शर्माले सरकारले तीव्र गतिमा काम गर्ने प्रतिबद्धता जनाए पनि त्यसको प्रभाव जनताको दैनिक जीवनमा देखिन नसकेको टिप्पणी गरे। उनले सरकारलाई व्यंग्यात्मक शैलीमा प्रश्न गर्दै भने, “दिन गनेर होइन, सेकेन्डमा काम गर्छु भन्ने सरकारले जनताको काम गर्ने सेकेन्ड कहिले पुर्याउँछ? कि त्यो सेकेन्ड अर्को सिजनमा आउँछ?”
उनले भने , हामीले बारम्बार सदनमा उठाएका भूकम्प पीडितका समस्या,किसानलाई मलको अभाव , सुकुम्बासीको उठिबास लगायतका बिषयमा सरकार गम्भीर नदेखिदा जनताले सास्ती भोग्नुपरेको छ।
उनले सरकारका घोषणा र वास्तविक कार्यसम्पादनबीच ठूलो अन्तर रहेको आरोप लगाउँदै जनताले अझै पनि सेवा प्रवाह, विकास निर्माण तथा आधारभूत समस्याको समाधानका लागि लामो समय कुर्नुपरेको बताए।
सांसद शर्माले सरकारलाई भाषण र घोषणाभन्दा परिणाममुखी काममा केन्द्रित हुन आग्रह गर्दै जनताले अनुभूति गर्ने गरी सेवा प्रवाहलाई प्रभावकारी बनाउनुपर्ने आवश्यकता औँल्याए।
