आठबिसकोट नगरपालिकाले कानुनी प्रक्रिया पूरा नगरी सञ्चालनमा रहेका दुई वटा क्रसर उद्योग बन्द गराएको छ।
रुकुम पश्चिमको आठबिसकोट नगरपालिकाले अवैध क्रसर उधोग धमाधम बन्द गरेको हो । नगरपालिकाका अनुसार झारमारे–साझेबगर सडक खण्ड अन्तर्गत ओएसिस–पूर्ण लक्ष्मी जे.भी.ले निर्माण कार्यका लागि आवश्यक ढुङ्गा, गिट्टी, बालुवा, बेस, सब-बेस तथा चिप्स उत्खनन र प्रशोधन गर्न क्रसर उद्योग सञ्चालन गर्नुपर्ने भए पनि नगरपालिकाबाट अस्थायी अनुमति नलिई क्रसर सञ्चालन गरेको पाइएको थियो।

Advertisement

उक्त कम्पनीलाई यसअघि पटक–पटक लिखित तथा मौखिक रूपमा अनुमति प्रक्रिया पूरा गर्न आग्रह गरिए पनि बेवास्ता गरेको भन्दै नगर प्रहरी उपशाखाले अनुगमन गरी आठबिसकोट नगरपालिका–२ मालङ्गेमा सञ्चालित क्रसर उद्योग आवश्यक प्रक्रिया पूरा नभएसम्मका लागि बन्द गराएको जनाएको छ।

त्यसैगरी भेरी करिडोर अन्तर्गत जाजरकोट–दुनै–मरिम–तेन्जे–धो सडक आयोजना अन्तर्गत तल्लोबगर–त्रिवेणी सडक खण्ड निर्माण गरिरहेको C.A.B. Construction Pvt. Ltd. ले पनि नगरपालिकाको अस्थायी अनुमति बिना वडा नं. ६ को दामाचौर क्षेत्रमा क्रसर उद्योग स्थापना गरी सञ्चालन गरेको भेटिएको छ।

नगरपालिकाले कानुन बमोजिम नगर प्रहरी र नेपाल प्रहरीको संयुक्त अनुगमनमार्फत उक्त क्रसर उद्योगलाई समेत सम्पूर्ण कानुनी प्रक्रिया पूरा नगरेसम्म सञ्चालन गर्न नपाउने गरी बन्द गराएको जनाएको छ।

नगरपालिकाले विकास निर्माणका नाममा कानुन मिच्ने तथा अनुमति बिना प्राकृतिक स्रोतको उत्खनन गर्ने कार्य कुनै पनि हालतमा स्वीकार्य नहुने चेतावनी दिएको छ। साथै सम्बन्धित निर्माण कम्पनीहरूलाई तत्काल आवश्यक प्रक्रिया पूरा गरी कानुनी दायराभित्र रहेर मात्र काम गर्न निर्देशन दिएको छ।