काठमाडौं । नेपाल यातायात व्यवसायी राष्ट्रिय महासंघद्वारा आयोजित सातौँ राष्ट्रिय महाधिवेशनबाट निर्वाचित केन्द्रीय कार्यकारिणी समितिको पदस्थापन तथा सम्मान कार्यक्रम भव्य रूपमा सम्पन्न भएको छ।
कार्यक्रममा बागमती प्रदेश सरकारका मुख्यमन्त्री ईन्द्रबहादुर बानियाँ प्रमुख अतिथिका रूपमा सहभागी हुनुभएको थियो। कार्यक्रममा महासंघको सातौँ राष्ट्रिय महाधिवेशनबाट निर्वाचित पदाधिकारी तथा सदस्यहरूलाई पदस्थापन गरिनुका साथै सम्मान गरिएको थियो।
प्रमुख अतिथि बानियाँले यातायात क्षेत्र देशको आर्थिक विकास, रोजगारी सिर्जना तथा नागरिकको दैनिक जीवनसँग प्रत्यक्ष रूपमा जोडिएको महत्वपूर्ण क्षेत्र भएको उल्लेख गर्दै यातायात व्यवसायलाई थप व्यवस्थित, सुरक्षित र प्रविधिमैत्री बनाउन सरकार प्रतिबद्ध रहेको बताउनुभयो।
कार्यक्रममा महासंघका नवनिर्वाचित नेतृत्वले व्यवसायीहरूको हकहित संरक्षण, यातायात क्षेत्रको आधुनिकीकरण तथा सेवा प्रवाहलाई प्रभावकारी बनाउन सक्रियतापूर्वक काम गर्ने प्रतिबद्धता व्यक्त गरेका थिए।
यातायात व्यवसायी, विभिन्न संघसंस्थाका प्रतिनिधि तथा सरोकारवालाको उल्लेख्य सहभागिता रहेको उक्त कार्यक्रममा नवनिर्वाचित नेतृत्वलाई सफल कार्यकालको शुभकामना व्यक्त गरिएको थियो।
