काठमाडौं । प्रतिनिधिसभा सदस्य गोपाल शर्माले सरकारले संसदको गरिमा र भूमिकालाई निरन्तर उपेक्षा गरिरहेको आरोप लगाएका छन्।
मंगलबार प्रतिनिधिसभाको बैठकमा बोल्दै सांसद शर्माले सरकारले संसदप्रति जवाफदेही बन्नुको सट्टा महत्वपूर्ण विषयहरूमा बेवास्ता गर्ने प्रवृत्ति देखाएको बताए। उनले जनताका सरोकारका विषयमा सांसदहरूले उठाएका प्रश्नहरूको समेत सरकारले उचित सम्बोधन नगरेको गुनासो गरे।
“सरकारले संसदलाई निरन्तर हेपिरहेको छ। संसद जनताको सर्वोच्च प्रतिनिधिमूलक संस्था हो, यसको सम्मान र निर्णयलाई बेवास्ता गर्न मिल्दैन,” उनले भने।
सांसद शर्माले संसदमा उठाइएका विषयमा सरकार गम्भीर नदेखिएको उल्लेख गर्दै लोकतान्त्रिक मूल्य र संसदीय अभ्यासको सम्मान गर्न सरकारलाई आग्रह गरे। उनले जनताका समस्याको समाधान र सुशासन कायम गर्न संसद र सरकारबीच प्रभावकारी समन्वय आवश्यक रहेको धारणा व्यक्त गरे।
उनले संसदलाई प्रभावकारी र परिणाममुखी बनाउन सरकार उत्तरदायी हुनुपर्नेमा जोड दिएका छन्। सदनमा मन्त्रालयको विषयमा छलफल गर्दा मन्त्रीहरु नै उपस्थित नभएको भन्दै आपत्ति जनाएपछि सदन १५ मिनेटका लागि स्थगित भएको थियो।
