नेकपा एमाले निकट युवा संघ नेपाल भित्र नेतृत्व चयनलाई लिएर असन्तुष्टि चुलिँदै गएको छ। यसैबीच, संगठनकी केन्द्रीय सदस्य तथा चितवन जिल्ला इन्चार्ज अमृता भट्टराईले पदबाट राजिनामा दिएकी छन्।
उनले पार्टीको संसदीय दलको नेतामा सुहाङ नेम्वाङ लाई चयन नगरेकोप्रति गम्भीर असन्तुष्टि जनाउँदै यस्तो निर्णय लिएको बताएकी छन्। भट्टराईका अनुसार हजारौँ कार्यकर्ताको आशा र भरोसा बोकेको युवा नेतृत्वलाई बेवास्ता गर्दै जनताको मतबाट निर्वाचित युवालाई पछाडि पारेर समानुपातिक प्रणालीबाट आएको व्यक्तिलाई नेतृत्वमा ल्याउनु संगठनको गलत प्राथमिकताको संकेत हो।
उनले पछिल्लो राजनीतिक घटनाक्रमप्रति संकेत गर्दै केही महिनाअघि मात्रै राजनीतिमा आएको व्यक्ति गृहमन्त्री बन्ने अवस्था रहेको उल्लेख गरिन्। तर, अनुभव, समझदारी र जनविश्वास प्राप्त युवा नेतालाई संसदीय दलको नेता बनाउन नसक्नुले संगठनभित्रको निर्णय प्रक्रिया र दृष्टिकोणमाथि गम्भीर प्रश्न उठाएको उनको भनाइ छ।
भट्टराईले समयअनुसार परिवर्तन गर्न नसक्ने नेतृत्वलाई समयले नै पछि पार्ने चेतावनी दिँदै युवाहरूको भावना र विश्वासमा ठेस पुगेको उल्लेख गरेकी छन्। “यदि यस्तै प्रवृत्ति जारी रह्यो भने नेताहरू मात्र रहनेछन्, कार्यकर्ताको साथ हराउँदै जानेछ,” उनले भनिन्।
आफूले लामो समयदेखि दिएको योगदान, विश्वास र समर्थनप्रति अब पछुतो महसुस हुन थालेको उल्लेख गर्दै उनले नेकपा एमाले भित्रको आफ्नो जिम्मेवारीबाट राजिनामा दिएको घोषणा गरेकी छन्। साथै उनले सुहाङ नेम्वाङ प्रति सम्मान र समर्थन कायम रहने बताएकी छन्।
