दाङ स्थित तुलसीपुर उपमहानगरपालिका वडा नम्बर १९ मा धारिलो हतियार प्रहार गरि श्रीमानले आफ्नै श्रीमतीको हत्या गरेका छन ।
रुकुम पश्चिम त्रिवेणी गाउँपालिका १० का ३४ वर्षीय गोपाल ओलीले आफ्नी श्रीमती २७ वर्षीया कमला ओलीको हत्या गरेको जिल्ला प्रहरी कार्यालय दाङले जनाएको छ ।
जिल्ला प्रहरी दाङका प्रहरी निरीक्षक बाबुराम बस्नेतका अनुसार बिहिवार साँझ करिब ७:३० बजेको समयमा श्रीमानले धारिलो हतियार प्रहार गर्दा गम्भीर घाइते भएकी कमलालाई उपचारको लागि प्रादेशिक अस्पताल तुलसीपुर लैजाँदै गर्दा बाटोमै मृत्यु भएको र अस्पताल पुग्नेबित्तिकै चिकित्सकले मृत घोषणा गरिदिएको बताएका छन भने हत्यारालाई प्रहरीले नियन्त्रणमा लिइसकेको र घटना बारे थप अनुसन्धान भईरहेको जानकारी दिएका छन ।
यही चैत्र १ गते रुकुम पश्चिमको मुसिकोट नगरपालिका १ खलंगा र सल्ले जोड्ने पुल बाट हाम फालेर आत्महत्या गरेका भाइ महेन्द्र ओलीको काजकिरिया सकेर दाङ फर्किएका गोपालले श्रीमतीको हत्या गरेको बताइएको छ । उनी सरकारी कर्मचारी रहेको र श्रीमान श्रीमती तुलसीपुर १९ स्थित बिजौरीमा बस्दै आएको जनाइएको छ ।
