रुकुम पश्चिम । आगामी निर्वाचनलाई लक्षित गर्दै नेपाली कम्युनिस्ट पार्टी (नेकपा) का उम्मेदवार गोपाल शर्मा यतिबेला गाउँ,गाउँमा जनभेटघाटलाई तीव्र बनाउँदै समर्थक तान्न सक्रिय देखिएका छन्।
घरदैलो अभियान, टोलसभा र युवासँग अन्तरक्रिया कार्यक्रममार्फत उनले मतदातासँग प्रत्यक्ष संवाद गरिरहेका छन्। विगतमा प्रदेशसभा सदस्य तथा मन्त्रीको जिम्मेवारी सम्हालिसकेका शर्माले आफूले थालेका अधुरा विकास योजनालाई निरन्तरता दिन पुनः जनमत आवश्यक रहेको बताएका छन्।
उनको अभियानमा विशेषगरी युवा र महिलाको उल्लेख्य सहभागिता देखिएको छ। स्थानीय स्तरमा सडक, खानेपानी, शिक्षा र स्वास्थ्य क्षेत्रमा भएका कामलाई प्राथमिकता दिँदै उनले “विकासको यात्रालाई रोकिन नदिने” प्रतिबद्धता व्यक्त गरेका छन्।
गाउँबस्तीमा पुग्दा मतदाताले रोजगारी सिर्जना, कृषि आधुनिकीकरण र पारदर्शी शासनको माग राखिरहेका छन्। जवाफमा शर्माले रोजगारीमुखी कार्यक्रम, साना उद्यम प्रवर्द्धन तथा सुशासनलाई आफ्नो प्रमुख एजेण्डा बनाएको बताएका छन्।
राजनीतिक रूपमा प्रतिस्पर्धा कडा बन्दै गएको अवस्थामा शर्माको सक्रिय अभियानले नेकपाको पक्षमा माहोल बन्ने संकेत देखिएको स्थानीय कार्यकर्ताहरू बताउँछन्। चुनावी सरगर्मी बढेसँगै रुकुम पश्चिममा उम्मेदवारहरूबीच प्रतिस्पर्धा थप रोचक बन्दै गएको छ।
