पोखरा : कालिका माध्यमिक विद्यालयले आफ्नो ६२औँ वार्षिकोत्सबको अवसरमा आयोजना गरेको वृहत खुल्ला रक्तदान कार्यक्रम सप्पन्न भएको छ ।
सामाजिक उत्तरदायित्वलाई आत्मसात गर्दै “तपाईंको एक थोपा रगत कसैको सम्पूर्ण जीवन बन्न सक्छ” भन्ने मूल नाराका साथ रगतको अभावका कारण बिरामीहरूले भोग्नुपरेको समस्यालाई न्यूनीकरण गर्दै जीवन रक्षामा योगदान पुर्याउने उद्देश्यले कार्यक्रम आयोजना गरिएको विद्यालय प्रशासनले बताएको छ ।
सम्पूर्ण अभिभावक, पूर्व विद्यार्थी, शिक्षाप्रेमी, समाजसेवी तथा स्थानीय बासिहरुको बाक्लो उपस्थिति सहित पोखरा महानगरपालिका वार्ड नम्बर १० स्थित विद्यालयको प्राङ्गणमा आयोजित उक्त कार्यक्रममा १०४ जनाले रक्तदान गरेका छन भने १०४ युनिट रगत संकलन भएको विद्यालयको शिक्षिका शान्ती श्रेष्ठले जानकारी दिनुभयो ।
निकै उत्साहजनक सहभागीतामा सम्पन्न रक्तदान कार्यक्रममा पहिलोपटक रक्तदान गर्ने देखि ३०औँ पटक ४२औं पटकसम्म निरन्तर रक्तदान गर्ने रक्तदाताहरुको उल्लेखनीय उपस्थिति रहेको थियो भने विद्यालयको यस महान काम मार्फत कसैको जीवन बचाउने अभियानमा सहभागी हुन पाएको भन्दै उपस्थित सबैले प्रशंसा सहित धन्यवाद व्यक्त गरेका थिए ।
