नेपाली कम्युनिस्ट पार्टीका तर्फबाट प्रतिनिधि सभा सदस्यका प्रत्यक्ष उम्मेदवार गोपाल शर्मा अनलले आफ्नो उम्मेदवारी पहिलो र अन्तिम पटक भएको स्पष्ट पार्नुभएको छ।
रुकुम जिल्लाको बाँफिकोट गाउँपालिका–७ र ८ मा आयोजित नेता–कार्यकर्ता तथा मतदातासँगको अन्तरक्रिया कार्यक्रममा बोल्दै शर्माले आफू यसअघि एकपटक प्रदेश सभा सदस्य र मन्त्रीसमेत भइसकेको स्मरण गराउँदै, त्यसबेलै दोहोरिएर माननीय नबन्ने प्रतिबद्धता व्यक्त गरेको बताउनुभयो।
प्रतिस्पर्धी उम्मेदवारतर्फ संकेत गर्दै उहाँले भन्नुभयो,“म सातौँ वा दसौँ पटक पनि मै हुनुपर्छ भन्ने सोचमा छैन। एक कार्यकाल तपाईंहरूको प्रतिनिधि भएर जिम्मेवारी पूरा गर्ने हो, त्यसपछि पार्टीको काममा फर्किने हो र नयाँ साथीहरूलाई अवसर दिने हो।”
उम्मेदवार शर्माले रुकुम जिल्लामा नेपाली कम्युनिस्ट पार्टीको संगठन अत्यन्त बलियो रहेको दाबी गर्दै संगठनकै बलमा आफूले भारी मतान्तरले चुनाव जित्नेमा पूर्ण विश्वस्त रहेको बताउनुभयो।
