रुकुम पश्चिम । नेपाली कम्युनिस्ट पार्टी (नेकपा) जिल्ला समिति रुकुम पश्चिमले आगामी प्रतिनिधिसभा निर्वाचनलाई लक्षित गर्दै “शिक्षा, स्वास्थ्य, रोजगारी र पूर्वाधार : आत्मनिर्भर रुकुम पश्चिमको आधार” भन्ने मूल नारासहित संकल्प पत्र सार्वजनिक गरेको छ।
सार्वजनिक गरिएको संकल्प पत्रमा जिल्लाको समग्र विकासका लागि पूर्वाधार, सामाजिक विकास, आर्थिक विकास, सुशासन, वातावरण संरक्षण र विपद् व्यवस्थापन लाई मुख्य प्राथमिकतामा राखिएको उल्लेख छ। सडक, पुल, खानेपानी, सिँचाइ, विद्युतीकरण तथा सूचना–सञ्चारको पहुँच विस्तार गरी ग्रामीण क्षेत्रलाई विकासको मूलधारमा ल्याउने लक्ष्य लिइएको छ।
शिक्षा क्षेत्रमा प्रत्येक पालिकामा गुणस्तरीय शैक्षिक संरचना निर्माण, प्राविधिक तथा व्यावसायिक शिक्षाको विस्तार, छात्रवृत्ति र स्थानीय पाठ्यक्रम विकास गर्ने प्रतिबद्धता जनाइएको छ। स्वास्थ्य क्षेत्रमा जिल्ला अस्पतालको स्तरोन्नति, आधारभूत स्वास्थ्य सेवाको पहुँच विस्तार, विशेषज्ञ सेवा तथा टेलिमेडिसिनलाई प्रभावकारी बनाउने योजना समेटिएको छ।
त्यस्तै, आर्थिक विकासतर्फ कृषि, पशुपालन, पर्यटन र साना उद्योगको प्रवर्द्धनमार्फत रोजगारी सिर्जना गर्ने लक्ष्य लिइएको छ। आधुनिक कृषि प्रविधि, उत्पादनको भण्डारण, प्रशोधन र बजारिकरणमा जोड दिइने उल्लेख छ। प्राकृतिक, धार्मिक र सांस्कृतिक पर्यटनको विकास गरी स्थानीय रोजगारी बढाउने योजना पनि संकल्प पत्रमा समावेश गरिएको छ।
सुशासन र सामाजिक न्याय अन्तर्गत भ्रष्टाचार नियन्त्रण, सेवा प्रवाहमा पारदर्शिता, महिला, दलित, आदिवासी जनजाति, अपाङ्गता भएका व्यक्ति र पिछडिएका समुदायको अधिकार सुनिश्चित गर्ने प्रतिबद्धता गरिएको छ। साथै, वन, वातावरण संरक्षण तथा विपद् जोखिम न्यूनीकरणका कार्यक्रमलाई प्राथमिकता दिइने जनाइएको छ।
यसैबीच, प्रतिनिधिसभा सदस्य पदका लागि प्रत्यक्षतर्फ का उम्मेदवार गोपाल शर्मा (अनल) र समानुपातिकतर्फ झक्कु प्रसाद घर्ती मगर उम्मेदवार रहेका छन् ।उम्मेदवारहरूले जनताको विश्वास र समर्थन प्राप्त गरी संकल्प पत्रलाई व्यवहारमा उतार्ने प्रतिबद्धता व्यक्त गरेका छन्।
पार्टीले जनताको आवश्यकता र अपेक्षाअनुसार विकास र परिवर्तनको यात्रालाई निरन्तरता दिने विश्वास व्यक्त गर्दै रुकुम पश्चिमलाई आत्मनिर्भर र समृद्ध जिल्लाको रूपमा विकास गर्ने लक्ष्य अघि सारेको छ।
