काठमाडौँ । कर्णाली प्रदेशको प्रतिनिधित्व गर्ने राष्ट्रिय सभा सदस्य छनोट प्रक्रियाबाट दुई जना उम्मेदवार निर्वाचित भएका छन् । सम्पन्न निर्वाचनको नतिजा अनुसार नेपाली काँग्रेस र नेकपा एमालेका उम्मेदवारले सफलता हासिल गरेका हुन् ।
आइतबार सम्पन्न राष्ट्रियसभा निर्वाचनमा काँग्रेस-एमालेबीचको सहकार्यबाट उम्मेदवार बनेका ललितजंग शाही र मिनासिं रखाल विजयी भएका छन् । शाही काँग्रेसका तर्फबाट तथा रखाल एमालेका तर्फबाट निर्वाचनमा सहभागी भएका थिए ।
अन्य समूह अन्तर्गत प्रतिस्पर्धामा उत्रिएका शाहीले प्रदेशसभा सदस्यतर्फ २६ र स्थानीय तह प्रतिनिधितर्फ १०० मतभार प्राप्त गरी निर्वाचित भए । उनका प्रतिस्पर्धी नेकपा (एकीकृत समाजवादी) का बुद्धिप्रसाद शर्माले प्रदेशतर्फ १३ र स्थानीयतर्फ ५० मतभार प्राप्त गर्दै पराजय व्यहोरे ।
त्यस्तै, महिला समूह अन्तर्गत उम्मेदवार रहेकी एमालेकी मिनासिं रखालले प्रदेशसभा सदस्यतर्फ २६ र स्थानीय तह प्रतिनिधितर्फ ९३ मतभार प्राप्त गरी विजय सुनिश्चित गरिन् । उनका प्रतिद्वन्द्वी नेकपाकी अन्जु महतारा शाहीले प्रदेशतर्फ १३ र स्थानीयतर्फ ५५ मतभार प्राप्त गरिन् ।
कर्णाली प्रदेशबाट भएको यस निर्वाचनमा प्रदेशसभाका ३९ सदस्य तथा स्थानीय तहका १५२ जना जनप्रतिनिधिले मतदान प्रक्रियामा सहभागिता जनाएका थिए ।
