निर्वाचन आयोगले आगामी फागुन २१ गतेका लागि तय भएको प्रतिनिधि सभा सदस्य निर्वाचनसँग सम्बन्धित पछिल्लो विवरण सार्वजनिक गरेको छ।
आयोगका अनुसार देशभरका विभिन्न निर्वाचन क्षेत्रबाट हालसम्म ४९ जना उम्मेदवारले आफ्नो उम्मेदवारी फिर्ता लिएका छन्।
आयोगले आज आयोजना गरेको साप्ताहिक पत्रकार सम्मेलनमा प्रवक्ता नारायणप्रसाद भट्टराईले आयोगको प्रणालीमा प्राप्त विवरणका आधारमा उक्त संख्या पुष्टि गरेका हुन्। उम्मेदवारी फिर्तासम्बन्धी विवरण अद्यावधिक हुने क्रम अझै जारी रहेको उनले जानकारी दिए।
आयोगका अनुसार उम्मेदवारी दर्तादेखि फिर्ता लिने चरणसम्मका सम्पूर्ण निर्वाचन कार्यक्रम शान्तिपूर्ण तथा उत्साहजनक रूपमा सञ्चालन भएका छन्। समानुपातिक निर्वाचन प्रणालीतर्फका उम्मेदवारहरूको प्रारम्भिक नामावली प्रकाशित भइसकेको र त्यसमा माघ १० गतेसम्म दाबी–विरोध पेश गर्न समय दिइएको प्रवक्ता भट्टराईले बताए।
समानुपातिक प्रणालीअन्तर्गत राजनीतिक दलहरूले पुस १३ र १४ गते बन्द सूची बुझाएका थिए। माघ १० गते दाबी-विरोधको प्रक्रिया समाप्त भएपछि समानुपातिकतर्फको अन्तिम नामावली सार्वजनिक गरिने आयोगले जनाएको छ।
यसैबीच, प्रत्यक्ष निर्वाचन प्रणालीतर्फका उम्मेदवारहरूको अन्तिम नामावली आजै देशभरका ७७ मुख्य निर्वाचन अधिकृत तथा ८८ निर्वाचन अधिकृतको कार्यालयमार्फत प्रकाशन गरिएको छ। आयोगका सहायक प्रवक्ता कुलबहादुर जिसीका अनुसार आज अपराह्न ४ बजेदेखि ७ बजेसम्म सम्बन्धित कार्यालयहरूबाट दलीय तथा स्वतन्त्र उम्मेदवारलाई निर्वाचन चिह्न प्रदान गरिने कार्यक्रम रहेको छ।
