पोखरा : सु–शान्त परिवारको आयोजनामा गण्डकी प्रदेशस्तरीय यू–१४ अन्तरविद्यालय ह्यान्डबल प्रतियोगिता सम्पन्न भएको छ । प्रतियोगिता सफलतापूर्वक सम्पन्न गराउन योगदान पुर्याएको भन्दै कदरस्वरूप पाँच जना युवालाई गण्डकी प्रदेशका मुख्यमन्त्रीले सम्मान गरेका छन् भने प्रतियोगिताले खेलमैदान मात्र होइन, युवा नेतृत्वको क्षमतासमेत उजागर गरेको छ ।
मुख्यमन्त्री द्वारा सम्मानित हुनेहरूमा क्लब अध्यक्ष तथा कार्यक्रम निर्देशक परिबेश थापा, कार्यक्रम सञ्चालक तथा सचिव सुदर्शन कोइराला, कोषाध्यक्ष विज्ञान क्षेत्री, सदस्य आयुष शर्मा र उप–सचिव चिरन थापा रहेका छन् साथै सीमित स्रोतसाधनका बाबजुद पनि योजनाबद्ध तयारी, प्रभावकारी समन्वय र अनुशासित व्यवस्थापनमार्फत प्रदेशस्तरीय प्रतियोगितालाई उदाहरणीय रूपमा सम्पन्न गरेका थिए ।
मुख्यमन्त्री तथा मन्त्रिपरिषद् कार्यालयमा आयोजित कार्यक्रममा मुख्यमन्त्रीले विद्यालय तहबाट खेलकुदको विकास गर्न यस्ता युवाको पहल निर्णायक हुने बताएका छन । उनले खेल केवल प्रतिस्पर्धा नभई अनुशासन, नेतृत्व र भविष्य निर्माणको माध्यम भएको उल्लेख समेत गरे ।
गण्डकी प्रदेशका विभिन्न जिल्लाबाट आएका यू–१४ उमेर समूहका विद्यालय टिमहरूको सहभागितासहित सम्पन्न प्रतियोगिताले ह्यान्डबल खेलप्रति विद्यार्थीहरूको आकर्षण बढाएको छ साथै प्रदेशस्तरमा नयाँ खेल प्रतिभा पहिचान र खेल संस्कृतिको विस्तारमा यो प्रतियोगिता महत्वपूर्ण बनेको आयोजक पक्षको भनाइ छ।
सु–शान्त परिवारको यस पहलले गण्डकी प्रदेशमा युवा नेतृत्वमा पनि उच्चस्तरीय खेलकुद कार्यक्रम सम्भव छ भन्ने स्पष्ट सन्देश दिएको छ।
