रुकुम पश्चिम। पूर्व अर्थमन्त्री तथा प्रगतिशिल लोकतान्त्रिक पार्टीका नेता जनार्दन शर्माले यो आफ्नो अन्तिम उम्मेदवारी भएको स्पष्ट पारेका छन्। रुकुम पश्चिममा आज उम्मेदवारी दर्ता पछि संचारकर्मी सँग बोल्दै शर्माले लामो राजनीतिक यात्रापछि अब नयाँ पुस्तालाई नेतृत्व हस्तान्तरण गर्ने समय आएको बताएका हुन्।
“म पटक–पटक जनताको प्रतिनिधि भएर काम गर्ने अवसर पाएँ। अब यो उम्मेदवारी मेरो राजनीतिक यात्राको अन्तिम चरण हो,” उनले भने, “राजनीतिमा निरन्तरता भन्दा पनि समयमै जिम्मेवारी हस्तान्तरण गर्नु लोकतन्त्रको सुन्दर पक्ष हो।”
शर्माले आफूले जनयुद्धदेखि शान्ति प्रक्रिया, संविधान निर्माण र सरकार सञ्चालनसम्म विभिन्न चरणमा भूमिका निर्वाह गरेको उल्लेख गर्दै जनताको विश्वास नै आफ्नो सबैभन्दा ठूलो पूँजी भएको बताए। उनले आगामी दिनमा प्रत्यक्ष राजनीतिभन्दा वैचारिक मार्गदर्शन र पार्टी निर्माणमा सक्रिय रहने संकेत पनि गरे। शर्माले विकास, सुशासन र सामाजिक न्यायका मुद्दामा आफू सधैं प्रतिबद्ध रहेको भन्दै जनताको समर्थन र विश्वासप्रति आभार व्यक्त गरे। “जनताले दिएको जिम्मेवारीलाई इमानदारीपूर्वक पूरा गर्ने प्रयास गरें, कमजोरी भए क्षमा चाहन्छु,” उनले भावुक हुँदै भने।
उनको यो अभिव्यक्तिपछि राजनीतिक वृत्तमा विभिन्न प्रतिक्रिया आउन थालेका छन्। समर्थकहरूले अनुभवी नेताको योगदानको प्रशंसा गर्दै सम्मानजनक बिदाइको सन्देश दिएका छन् भने कतिपयले उनको भूमिकालाई अझै आवश्यक रहेको टिप्पणी गरेका छन्।
