समानुपातिकतर्फको अन्तिम बन्द सूची सार्वजनिक नहुँदै “श्रीमान–श्रीमती उम्मेदवार” भएको भन्दै भइरहेको प्रचारप्रति नेपाली कम्युनिष्ट पार्टीका नेता गोपाल शर्माले प्रष्ट पारेका छन्।
स्पष्टिकरणमा भनिएको छ, कि समानुपातिक बन्द सूचीमा क. अन्जुको नाम समावेश भएको जानकारी पाएपछि कुनै एक जनामात्र उम्मेदवार हुने गरी निर्णय लिन पार्टी संयोजक क. प्रचण्डलाई पहिल्यै जानकारी गराइएको थियो। संयोजकसँग भएको छलफलको आधारमा अन्तिम बन्द सूचीमा क. अन्जुको नाम समावेश नहुने निश्चित भइसकेको जनाइएको छ।
अन्तिम उम्मेदवार सूची सार्वजनिक नहुँदासम्म धैर्य गर्न र तथ्यका आधारमा आलोचना गर्न उपयुक्त हुने स्पष्टिकरणमा उल्लेख छ।
साथै, विगत २० वर्षदेखि दाम्पत्य जीवनको सुरुवातसँगै पार्टीको निर्णयअनुसार अलग–अलग जिल्लामा समान जिम्मेवारीका साथ सक्रिय रहँदै आएको पनि बताइएको छ।राजनीतिमा एकले अर्काको सहारामा अघि बढेको वा खोजेको अवस्था कहिल्यै नरहेको दाबी गर्दै वक्तव्यमा भनिएको छ, “हामीले लिएका सबै जिम्मेवारी व्यक्तिगत चाहना वा अपेक्षाका आधारमा होइन, पार्टी कमिटीले आवश्यक ठानेको आधारमा हुन्।”
उनले फरक फरक कार्यक्षेत्रमा पार्टीको जिम्मेवारी लिएर काम गरिरहेको र पार्टीले आवश्यक ठानेमा जिम्मेवारी लिन सक्ने भन्दै अन्तिम मिति सम्म धैर्य गर्न आग्रह समेत गरेका छन्।
यदि पार्टीले नाम फिर्ता नलिएमा पनि अघिल्लो निर्वाचनमा जस्तै उम्मेदवारी फिर्ता लिन पाउने समयमा नाम फिर्ता गरिने स्पष्टिकरणमा उल्लेख गरिएको छ। श्रीमान् श्रीमती उम्मेदवार भएको भन्दै सामाजिक संजालमा आलोचना गरेपछि नेता शर्माले प्रष्ट रुपमा सामाजिक संजालमा उम्मेदवार बारे स्पष्ट पारेका छन्। सिफारिस भएपनी अहिले उम्मेदवारले नाम फिर्ता लिने समय नआएको हुँदा धैर्य गर्न सुझाव दिइएको छ।
