रोल्पा । राष्ट्रपति रनिङ सिल्ड प्रतियोगितामा सहभागी भई घर फर्कँदै गरेका विद्यार्थी सवार जिप रोल्पामा दुर्घटना हुँदा दुई जनाको मृत्यु भएको छ । शनिबार राति भएको उक्त दुःखद् घटनामा परी अन्य ९ जना विद्यार्थी घाइते भएका छन् ।
जिल्ला प्रहरी कार्यालय रोल्पाका अनुसार दुर्घटनामा सुनछहरी गाउँपालिका–४ स्युरीका १२ वर्षीया दीपा पुन र सोही ठाउँका १२ वर्षीय सुनिल विकको ज्यान गएको हो । दिनभरको खेलकुद प्रतियोगिता सकेर उत्साहका साथ घरतर्फ जाँदै गरेका उनीहरूको यात्रा अधुरो बन्न पुग्यो ।
प्रहरी निरीक्षक सुनिल थापा नेपालीले दिएको जानकारी अनुसार, सुनछहरी गाउँपालिका–१ सेरमबाट वडा नम्बर ४ स्युरीतर्फ जाँदै गरेको ग १ ज ६६६६ नम्बरको बोलेरो जिप शनिबार राति करिब १० बजेतिर अनियन्त्रित भई दुर्घटनामा परेको थियो ।
दुर्घटना लगत्तै स्थानीय बासिन्दा र प्रहरीको टोलीले घाइतेहरूको उद्धार गरी प्राथमिक स्वास्थ्य केन्द्र सुलिचौर पुर्याएको थियो । तर, अस्पताल पुर्याउनासाथ चिकित्सकले दीपा र सुनिललाई मृत घोषणा गरेका थिए । दुर्घटनामा घाइते भएका अन्य ९ जना विद्यार्थीलाई थप उपचारका लागि बुटवल सिटी अस्पताल रिफर गरिएको प्रहरीले जनाएको छ ।
प्रहरीले जिप चालक रोल्पाको लुंग्री गाउँपालिका–७ का २५ वर्षीय मन्सुर घर्तीलाई नियन्त्रणमा लिएको छ । घटनाको थप अनुसन्धान भइरहेको प्रहरी निरीक्षक नेपालीले जानकारी दिएका छन् ।
