दाङ । नेकपा (बहुमत) निकट विद्यार्थी संगठन अनेरास्ववियू (क्रान्तिकारी)लुम्बिनी प्रदेशले नेपाल संस्कृत विश्वविद्यालयका उपकुलपति धनेश्वर नेपालमाथि भ्रष्टाचार र अनियमितताका कारण जनकारबाही गरिएको जनाएको छ। संगठनले उक्त कारबाहीको सम्पूर्ण जिम्मेवारी लिँदै शैक्षिक क्षेत्रभित्र मौलाउँदै गएको भ्रष्टाचारविरुद्ध संघर्षलाई थप तीव्र बनाएकाे घोषणा गरेको छ।
प्रदेश इन्चार्ज प्रेम प्रशान्त बोहराद्वारा हस्ताक्षरित विज्ञप्तिमा मन्त्रालयदेखि वडास्तरसम्म करको भार बढाएर कमिसन र भ्रष्टाचारमा लिप्त शक्तिहरू सक्रिय रहेको उल्लेख गर्दै नेपाल संस्कृत विश्वविद्यालय पनि लामो समयदेखि दलीय भागबन्डा, आर्थिक चलखेल र अव्यवस्थाको सिकार बन्दै आएको आरोप लगाइएको छ।
अनेरास्ववियू (क्रान्तिकारी)का अनुसार पर्याप्त स्रोतसाधन हुँदाहुँदै पनि विश्वविद्यालयमा शैक्षिक तथा भौतिक सुधार नगरी कागजी बिल–भरपाइका आधारमा भुक्तानी गर्ने, ठेकेदार र प्रशासनबीच मिलेमतो गरी कमिसन असुल्ने कार्य हुँदै आएको छ। यसले विद्यार्थीको भविष्य र विश्वविद्यालयको गरिमामाथि गम्भीर आघात पुगेको संगठनको भनाइ छ।
संगठनले उपकुलपति धनेश्वर नेपाललाई भ्रष्ट कमिसनखोरहरूको संरक्षकको रूपमा चित्रण गर्दै भ्रष्टाचार अभियोग लागेका व्यक्तिलाई पुनः रजिष्ट्रारमा सिफारिस गर्नु, परीक्षा प्रणालीमा अनियमितता गर्नु, TADA दुरुपयोग गर्नु तथा विश्वविद्यालयको जग्गामा आर्थिक चलखेल गर्नुजस्ता कारणले जनकारबाही गर्न बाध्य भएको जनाएको छ।
अनेरास्ववियू (क्रान्तिकारी)ले विश्वविद्यालय सुधार, सरकारी सम्पत्तिको संरक्षण र भ्रष्टाचारविरुद्धको आन्दोलनमा युवाविद्यार्थी र आम नागरिकलाई सहभागी हुन आह्वान गरेको छ। राज्यबाट संरक्षित भए पनि भ्रष्टाचारमा संलग्न जो–कोही जनकारबाहीबाट उम्किन नसक्ने चेतावनी संगठनले दिएको छ।
