रुकुम पश्चिम । रुकुम पश्चिममा जनयुद्धका क्रममा घाइते तथा अपांग बनेका द्वन्द्वपीडितका लागि आएको राहत तथा सेवा–सुविधा उचित रूपमा वितरण हुन नसकिरहेको गुनासो सार्वजनिक भएको छ। सामाजिक सञ्जाल मार्फत स्थानीयहरूले राहत रकम साविकको माओवादीका पार्टी कार्यकर्ताले दुरुपयोग गरेको आरोपसमेत लगाएका छन्।
फेसबुकमा गरिएको प्रतिक्रियामा आठबिसकोट नगरपालिकाकी उपप्रमुख धन कुमारी शाहीले साविकको माओवादी केन्द्र अन्तर्गत जनमुक्ति सेना, घाइते तथा द्वन्द्वपीडितको नाममा आठबिसकोटतर्फ आएको ७५ लाख रुपैयाँ ‘आफ्नै कार्यकर्ताले बाडेर खाएको’ उल्लेख गरेकी छन्। उनका अनुसार धेरै पीडितले न्यायिक समितिमा निवेदन दिए पनि सुनुवाइ हुन नसकेको बताइएको छ।
आफुले पटक पटक पालिकाको बैठक र पार्टीमा कुरा उठाउँदा कसैले नटेरेको बताएकी छन। द्वन्द्वमा ज्यान गुमाएका घाइते परिवारका लागि सरकारले दिने राहत रकम समेत पार्टीका बिचौलियाहरुले खाने गरेको उनको गुनासो छ । कार्यपालिकामा आफुले पीडितको पैसा कसले खायो? छानविन गरौँ भनेर आवाज उठाउँदा समेत आफुलाई दबाउन खोजिएको शाहीको भनाई छ ।
शाहीले सामाजिक सञ्जालमा भनेकी भनेकी छन्,“द्वन्द्वपीडितका नाममा आएको पैसा पनि कार्यकर्ताले बाडेर खाए । पीडितका पक्षमा बोल्दा कोही सुन्दैनन्। बडी लिनेहरूले ३० लाखसम्म लिएका छन् । तर दिन्छौँ भनेर झुक्याइन्छ। दिदैनन। पीडितलाई न रोजगारी छ, न उचित व्यवस्थापन।”
शाहीले पीडितको नाममा आउने सेवा तथा सुविधासमेत बिचौलियाले खाइदिने गरेको बताउदै अब पीडितलाई ‘फुलमाला मात्र लगाएर हुने हैन, उचित ठाउँमा सम्मानजनक व्यवस्थापन गरिनुपर्छ’ भन्ने धारणा राखेकी छन्।
रुकुममा द्वन्द्वपीडितका घाउ–चोट तथा अपांगता अनुसार प्रदान गरिने राहत, भत्ता, पुनर्स्थापना तथा रोजगारीका कार्यक्रमहरू प्रभावकारी नहुँदा अझै पनि धेरै पीडित समस्या बोकेरै बसेका छन्। यसबारे सम्बन्धित निकायको ध्यानाकर्षण गराउनुपर्ने स्थानीयको भनाई छ।
