प्रधानमन्त्री सुशीला कार्कीका प्रमुख स्वकीय सचिव आदर्शकुमार श्रेष्ठले आफ्नै परिवारका सदस्य तथा नातेदारलाई प्रधानमन्त्रीको संवेदनशील सचिवालयमै नियुक्ति दिलाएको खुलेको छ।

प्रधानमन्त्री तथा मन्त्रिपरिषद् कार्यालयसँग सचिवालयलाई श्रेष्ठ मार्फत परिवार केन्द्रित बनाएको आरोप लागेको छ।आदर्श श्रेष्ठले आफ्नी पत्नी संगीता श्रेष्ठलाई सहसचिव सरहको स्वकीय सहसचिवमा नियुक्त गराएका छन्। यस्तै, नातेदार कमला श्रेष्ठलाई पनि उही पदमा उठाइएको छ। दुवैको नियुक्ति असोज २ गते एकैदिन गरिएको हो।

नासु सरहको प्रशासन सहायकमा पुनम श्रेष्ठ र रविना श्रेष्ठ नामका व्यक्तिहरू पनि नियुक्त गरिएको खुलासा भएको छ। प्रधानमन्त्री सुशीला कार्की पदभार सम्हालेको एक साताभित्रै यी नियुक्तिहरू प्रधानमन्त्रीको सचिवालयमा भएको हो।

आदर्श श्रेष्ठ यसअघि सर्वोच्च अदालतको सूचना प्रविधि महाशाखामा करारमा कार्यरत थिए। सुशीला कार्की सर्वोच्चका प्रधानन्यायाधीश हुँदा पनि उनी त्यही कार्यालयमा समेत कार्यरत रहेको पृष्ठभूमि छ।