रुकुम पश्चिम। नेपालको राजनीतिमा माओवादी आन्दोलनले ठूलो प्रभाव पारेको छ। दशकौँ सम्म चलेको जनयुद्धपछि माओवादी पार्टीले शान्ति प्रक्रियामा प्रवेश गर्दै देशलाई गणतन्त्रमा रूपान्तरण गर्न महत्वपूर्ण भूमिका खेलेको हो। तर, समयसँगै पार्टीभित्र वैचारिक मतभेद, स्वार्थ, नेतृत्व संघर्ष र सत्ता मोहका कारण माओवादी आन्दोलन विभिन्न टुक्रामा विभाजित हुन पुग्यो। आज माओवादी फुटेपछि नेपालको राजनीतिक परिदृश्यमा नयाँ अवस्था देखा परेको छ।

नेकपा माओवादी केन्द्र फुटेपछि पुष्पकमल दाहाल प्रचण्डले वाम एकता भन्दै नेपाली कम्युनिष्ट पार्टीको नेतृत्व गरेका छन्। भने अर्कोतिर पार्टीमा शक्तिशाली नेताका रुपमा रहेका माओवादीका उपमहासचिव जनार्दन शर्माले प्रगतिशील राष्ट्रिय अभियान घोषणा गरेका छन। माओवादी फुटेपछि बिशेष गरी जनयुद्धको थालनी भएको रुकुम पश्चिमलाई चासोको बिषयका रुपमा हेरिएको छ।

जनार्दन शर्माको जिल्ला रुकुम पश्चिममा नेपाली कम्युनिष्ट पार्टी र प्रगतिशील अभियान दुबैले संगठन बिस्तार लाई तीव्रता दिएका छन। रुकुम पश्चिमको सबैभन्दा ठुलो आठबिसकोट नगरपालिकामा पनि नेता तथा कार्यकर्ताहरु दुई पक्षमा विभाजन भएका छन्। नेकपा माओवादी केन्द्रबाट स्थानीय तहको नगर प्रमुख र उप प्रमुख जितेका दुबैजना फरक फरक यात्रामा लागेका छन।

नगर प्रमुख रवि केसी प्रचण्ड नेतृत्वको नेपाली कम्युनिस्ट पार्टीमा लागेका छन्। भने उपप्रमुख धन कुमारी शाही जनार्दन शर्मा नेतृत्व प्रगतिशील रास्ट्रीय अभियानमा लागेकी छन्। एउटै पार्टीबाट चुनाव जितेका दुबैजना अहिले फरक फरक धारमा हिडेका छन्। नगर प्रमुख रवि केसीको साथमा वडा नम्वर १,२,३,८ र १२ वडाका वडा अध्यक्षहरु छन्। भने उपप्रमुख धन कुमारी शाहीको साथमा वडा नम्वर १०,१३ र १४ नम्वर वडाका अध्यक्षहरु खुलेका छन्। भने ५ नम्वरका वडा अध्यक्ष मौन छन्। भने उनले जनार्दन शर्मालाई साथ दिने स्रोतको दाबी छ।

त्यस्तै माओवादीले स्थानीय तहको निर्वाचन हारेको वडा नम्वर ४ मा पनि उपमेयर धन कुमारी शाहीको पक्षमा नेताकार्यकर्ता रहेको बताईन्छ। भने वडा नम्वर ११ मा अधिकांश नेताहरु नगर प्रमुख रवि केसीको पक्षमा खुलेका छन्। त्यस्तै ७ नम्वर वडाका अध्यक्ष अमृत बुढा नगर प्रमुख केसीको पक्षमा खुलेका छन् । उनी केहिदिन पहिले नेपाली कम्युनिष्ट पार्टीको बैठकमा देखिएका थिए।

पार्टी विभाजन पछी वडा नम्वर ६ र ९ भने निर्णायक रुपमा हेरिएको छ। यी वडामा केहि अभियान र केही नेकपामा रहेका छन्। पार्टी बिभाजन पछि रुकुम पश्चिममा प्रगतिशिल अभियानको नेतृत्व गोर्ख बहादुर केसी सन्देशले गरेका छन्। भने नेपाली कम्युनिष्ट पार्टीको नेतृत्व गोपाल शर्मा ,बिमला केसी लगायतका नेताहरुले गरिरहेका छन्।

माओवादी फुटेपछि यसको राजनीतिक प्रभाव निकै घटेको छ। २०६४ सालको संविधानसभा निर्वाचनमा पहिलो दल बनेको माओवादी अहिले संसदमा तेस्रो स्थानमा झरेको छ। जनस्तरमा माओवादीको लोकप्रियता घट्दै गएको बेला पार्टीभित्र वैचारिक एकता हराएपछि फुटेको पार्टीका कार्यकर्ताहरूमा निराशा बढेको छ।