जेन–जी आन्दोलनमा भवन जलाउन रसायन प्रयोग भए नभएको वैज्ञानिक परीक्षण हुने

जेन–जी आन्दोलनका क्रममा सरकारी तथा निजी भवनमा भएको आगजनीमा प्रज्वलनशील रसायन प्रयोग भएको भए नभएको पत्ता लगाउन वैज्ञानिक परीक्षण गरिने भएको छ ।

आन्दोलनका क्रममा भएको दमन र हिंसात्मक गतिविधि छानबिन गर्न गठन गरिएको जाँचबुझ आयोगले महत्त्वपूर्ण भवनहरूबाट खरानी सङ्कलन गरेर परीक्षणका लागि नेपाल प्रहरी केन्द्रीय विधिविज्ञान प्रयोगशालालाई निर्देशन दिएको प्रवक्ता विज्ञानराज शर्माले जानकारी दिए ।

नेपाली सेनाले सङ्कलन गरेको विवरणअनुसार भदौ २३ र २४ गतेको जेन–जी प्रदर्शनका क्रममा सरकारी कार्यालयसहित करिब सात सय संरचनामा क्षति पुगेको छ । संसद् भवन, सिंहदरबारस्थित प्रधानमन्त्री कार्यालय, सर्वोच्च अदालत, राष्ट्रपतिको कार्यालय शीतलनिवास, बालुवाटारस्थित प्रधानमन्त्री निवास, मन्त्रीहरूको निवास लगायतका महत्त्वपूर्ण सरकारी कार्यालयमा आगजनी भएको थियो ।