पूर्व शिक्षा, विज्ञान तथा प्रविधि मन्त्री विद्या भट्टराईले वर्तमान मन्त्री महावीर पुनलाई शिक्षा क्षेत्र सुधारका लागि विस्तृत ३० बुँदे सुझावपत्र पठाएकी छिन्।
भट्टराईका अनुसार मन्त्री पुनले फोनमार्फत आफ्नो कार्यकालमा सुरु भएका काम, योजना र निर्देशनबारे सुझाव पठाउन आग्रह गरेका थिए।
उनले फेसबुकमार्फत लेखेकी छिन्, “मन्त्री महावीर पुनले सुरु गरेका योजना, काम र निर्देशनबारे सुझाव पठाउन अनुरोध गर्नुभयो। वहाँप्रति आभार र कृतज्ञता व्यक्त गर्दै मैले आफ्नो कार्यकालमा बनेका अध्ययन, सुझाव र आधार तयार भएका केही कार्ययोजना पठाएकी छु, जसलाई तुरुन्तै वहाँले लागू गर्न सक्नुहुनेछ भन्ने विश्वास छ।”
मुख्य १० प्रमुख बुँदाहरू :
१. विदेशी सम्बन्धन प्राप्त विश्वविद्यालयका कलेजहरू : ५९ मध्ये १३ मात्र मापदण्डअनुसार, बाँकीलाई तुरुन्त निर्देशन दिनुपर्ने सुझाव।
२. शैक्षिक परामर्शदातृ संस्था : अनिवार्य नविकरण प्रणाली लागू, नियमावली तयार, रेकर्ड अद्यावधिक।
३. किताब नीति : अन्तिम मस्यौदा अदालतमा विचाराधीन।
४. CTEVT सुधार : गुणस्तर प्रत्यायन नियमावली तयार, पाठ्यक्रम पुनरावलोकनको आवश्यकता।
५. विद्यालय दरबन्दी पुनरावलोकन : असमान वितरण अन्त्यका लागि तुरुन्त कार्यान्वयनको माग।
६. त्रिवि र संस्कृत विश्वविद्यालयको जग्गा छानबिन प्रतिवेदन : सार्वजनिक गर्न प्रधानमन्त्री कार्यालयको अनुमति आवश्यक रहेको उल्लेख।
७. परीक्षा सुधार योजना : राष्ट्रिय परीक्षा बोर्ड र पाठ्यक्रम विकास केन्द्रबीच समन्वयमा नयाँ कार्ययोजना तयार।
८. डिजिटल डाटाबेस : विदेशमा रहेका विद्यार्थी र विश्वविद्यालयबीच समन्वयका लागि डिजिटल संयन्त्र निर्माणको प्रस्ताव।
९. विद्यालय पाठ्यक्रम पुनरावलोकन : अस्पष्टता र भाषागत त्रुटि सच्याउन निर्देशन।
१०. अनिवार्य तथा निशुल्क शिक्षा ऐनको कार्यान्वयन : तीन तहको लगानी साझेदारी र संघीय कोष निर्माण आवश्यक।
भट्टराईले थप बुँदाहरूमा शिक्षक सरुवा, भर्चुअल कक्षा, विशेष परीक्षा प्रणाली, वाल विकास शिक्षा, सामुदायिक विद्यालयमा निःशुल्क सेवा, छात्रवृत्ति व्यवस्था, निजी विद्यालय नियमन र शिक्षकहरूको सामाजिक सुरक्षा लगायतका विषयमा ठोस सुझाव दिएकी छन्।
उनले आफ्नो कार्यकालमा तयार भएका अधिकांश योजना अदालतको मुद्दा, राजनीतिक अस्थिरता र सरकार परिवर्तनका कारण अपूर्ण रहेको बताएकी छिन्।
सुझावपत्रमा उनले लेखेकी छन् —
“म विश्वास गर्छु, वर्तमान मन्त्री महावीर पुनले यी योजनाहरूलाई अद्यावधिक गरी तुरुन्तै लागू गर्न सक्नुहुन्छ भने शिक्षा क्षेत्रमा गुणात्मक रुपान्तरण सम्भव छ।”
