नेपालमा पछिल्ला हिंसात्मक प्रदर्शन र अस्थिर परिस्थितिलाई कारण देखाउँदै क्यानडाले कैयन् नेपाली नागरिकहरुको भिसा अस्वीकार गरेको छ।

अध्ययन र भ्रमण र कामदारका लागि आवेदन दिएका धेरै नेपालीहरुको भिसा हालै अस्वीकृत भएको पुष्टि भएको छ। क्यानडा इमिग्रेशन, रिफ्युजी एण्ड सिटिजनसिप विभागले पठाएको पत्रमा भनिएको छ, “सेप्टेम्बर २०२५ मा आवेदक नागरिक रहेको देशमा ठूलो हिंसात्मक विरोध प्रदर्शनहरू भए तथा सुरक्षा र वित्तीय स्थितिमा गम्भीर गिरावट आएको छ। यस्तो अवस्थामा आवेदकको क्यानडासँग पर्याप्त सम्बन्ध देखिन्न।”

सामान्यतया बैंकक र सिंगापुरस्थित क्यानडियन भिसा अफिसमार्फत भिसाको निर्णय हुने गरेकोमा, यस पटक नेपालको अस्थिर अवस्थालाई नै मुख्य कारण देखाउँदै भिसा अस्वीकृत गरिएको हो। यस कदमपछि विशेषगरी अध्ययन भिसाका लागि तयारी गरिरहेका धेरै विद्यार्थी चिन्तित भएका छन्।

यस्तै, अन्य केही देशले पनि नेपालको पछिल्लो अवस्थालाई आधार बनाउँदै भिसा अस्वीकार गर्न थालेको जानकारी प्राप्त भएको छ।

हेन्ले ग्लोबलको पछिल्लो तथ्यांकअनुसार पनि नेपालको पासपोर्ट विश्वकै कमजोर पासपोर्टमध्ये पर्दै आएको छ। सूचीमा नेपाल एक सय नम्बरमा पर्छ भने अफगानिस्तान, सिरिया, इराक, यमन, पाकिस्तान, सोमालियापछि नेपाल कमजोर पासपोर्ट भएका मुलुकहरुमध्ये पर्दछ। प्यालेस्टाइन, उत्तर कोरिया र लिबियाका पासपोर्टसमेत नेपालको भन्दा बलिया रहेको तथ्यांकले देखाउँछ।