नेपाली महिलाहरुको चाड हरितालिका नजिए सङ्गै गाउँ देखि शहर सम्म माहोल तात्तिएको छ । बिभिन्न संघसस्था, सरकारी कार्यालयहरुमा कार्यरत महिला दिदिबहीनीहरुले दर खाने, नाँच्ने जस्ता कार्यक्रमहरुको आयोजना गरिरहेका छन्। यसै सन्दर्भमा रुकुम पश्चिमको आठबिसकोट नगरपालिकाभर तीज विशेष कार्यक्रम परम्परा, उत्सव र नारी सशक्तिकरणको कार्यक्रमको आयोजना गरिएको छ ।
हरितालिका तीज नजिकिँदै गर्दा नगरपालिकाभर तीजको चहलपहल बढ्दै गएको छ। महिलाहरू परम्परागत पोशाकमा सजिएर, नाचगानमा रमाउँदै, शिव–पार्वतीको आराधना लिन भएका छन्। यस वर्ष नगरपालिकाले तीजलाई भव्य रूपमा मनाउने उद्देश्यले विभिन्न सांस्कृतिक तथा सामाजिक कार्यक्रमहरूको आयोजना गरेको छ। 
१४ वटै वडामा भड्किलो र खर्चिलो नहुनेगरी तीज बिशेष कार्यक्रम मनाईएको आठबिसकोट नगरपालिकाका नगर उपप्रमुख धन कुमारी शाहीले जानकारी दिईन्। शाहीले भनिन वर्षमा एकपटक आउने महिलाहरुको महान चाडको अवसरमा सामाजिक सद्भाव कायम राख्ने गरी नगरपालिकाका सबै वडाहरुमा कार्यक्रमको आयोजना गरिएको छ । सामाजिक सचेतना सहित दरखाने कार्यक्रम सङ्गै नाँचगान को आयोजना गरिएको उपप्रमुख शाहीले बताइन्।
वडा नम्वर ९ का वडा अध्यक्ष जनक बहादुर बटालाले आज आइतवार वडाको आयोजनामा तीज बिशेष कार्यक्रमको आयोजना गरिएको जानकारी दिए । नगरपालिकाभर तीज कार्यक्रम मनाईरहँदा वडा नम्वर -९ मा पनि तीज बिशेष कार्यक्रमको आयोजना गरिएको बताए । तीजलाई “नारी सशक्तिकरण र सांस्कृतिक पहिचानको प्रतीक”को रूपमा उल्लेख गरे। कार्यक्रममा स्थानीय कलाकारहरूको नृत्य, बालबालिका, महिला द्वारा नृत्य प्रस्तुत गरिएको छ।
महिलाहरूको सहभागितामा आयोजित तीज बिशेष कार्यक्रममा सबै वडाका गाउँ टोल तथा स्थानीय संघसंस्थाका टोल टोलीहरूको सहभागिता उल्लेखनीय रहेको वडा नम्वर-५ का अध्यक्ष घनश्याम भण्डारीले जानकारी दिए । सामाजिक सन्देश बोकेको तीज वडा नम्वर -५ मा पनि बिबिध साँस्कृतिक कार्यक्रमहरुको आयोजना गरिएको हो ।
यस वर्षको तीज कार्यक्रम केवल रमाइलोमा सीमित नरही सामाजिक सन्देश पनि बोकेको र नगरपालिकाले घरेलु हिंसा विरुद्ध सचेतना, नारी शिक्षा, र आत्मनिर्भरता सम्बन्धी सूचना राखेर जनचेतना फैलाएको नगरपालिकाले जनाएको छ ।
तीज विशेष कार्यक्रमले नगरपालिकाभित्र सांस्कृतिक विविधता र सामाजिक एकताको सन्देश दिएको छ। फरक , फरक जात, समुदाय र उमेर समूहका महिलाहरू एउटै मञ्चमा भेला भएर नाचगान र भजनमार्फत एक आपसमा आत्मीयता बढाएका थिए ।
तीज विशेष कार्यक्रम नगरपालिकाको सक्रियता, स्थानीय समुदायको सहयोग र महिला सहभागिताको उत्कृष्ट मिसाल बनेको छ। परम्परालाई जगेर्ना गर्दै आधुनिक सन्देश समेटिएको यो उत्सवले वर्षभरिका थकान भुलाउँदै समाजमा सकारात्मक ऊर्जा प्रवाह गरेको छ ।
