रुकुम पश्चिम । जिल्लाको आठबिसकोट नगरपालिका-९ स्थित कालिका माविको नवनिर्मित भवन उद्घाटन गरिएको छ । बुधबार एक कार्यक्रमका बिच नगर प्रमुख रवि केसीले नयाँ विद्यालय भवन उद्घाटन गरेका हुन । उक्त भवनको उद्घाटन नगरप्रमुख रवि केसी उप–प्रमुख धन कुमारी शाही, वडाअध्यक्ष जनक बहादुर बटाला र विव्यस अध्यक्ष कर्ण बहादुर बटालाले संयुक्त रूपमा गरेका हुन्।
कार्यक्रममा नगरप्रमुख केसीले विद्यालयको भौतिक पूर्वाधार सुधारसँगै गुणस्तरीय शिक्षामा जोड दिने बताए । केसीले भने, “शिक्षा क्षेत्रमै लगानी गर्दा मात्र दीगो विकास सम्भव छ। यो भवन हाम्रो बालबालिकाको उज्जवल भविष्यका लागि एउटा सशक्त आधार हो।” आगामी दिनमा थप विद्यालयहरूको स्तरोन्नति सँगै शिक्षामा पनि नगरपालिका लागिपर्ने प्रतिबद्धता व्यक्त गरे ।
त्यस्तै उप–प्रमुख शाहीले भवन निर्माणमा स्थानियवासी, शिक्षक, अभिभावक र प्राविधिकहरूको सहकार्यप्रति आभार व्यक्त गर्दै भनिन , “शिक्षा मात्रै होइन, स्वास्थ्य, सरसफाइ र सामुदायिक विकासमा पनि नगरपालिका समान ध्यान दिइरहेको छ। यस्तो सहकार्य नै हाम्रो समृद्धिको बाटो हो ।आठ कोठे सो भवन निर्माणका लागि नगरपालिकाको पहलमा निर्माण गरिएको हो । 
भवन उद्घाटन समारोहमा नगर प्रमुख उपप्रमुख, वडा अध्यक्ष, विद्यालय व्यवस्थापन समिति, शिक्षक, अभिभावक र विद्यार्थीहरूको बाक्लो उपस्थिति रहेको थियो । उद्घाटन समारोहमा बोल्दै वडा नम्वर-९ का अध्यक्ष जनक बहादुर बटालाले नव–निर्मित विद्यालय भवनको उद्घाटन नगरपालिकाका लागि एउटा महत्वपूर्ण उपलब्धि भएको बताए । उनले भने, बालबालिकाहरूले अब सुरक्षित र राम्रो पूर्वाधारयुक्त वातावरणमा अध्ययन गर्न पाउनेछन्।
नगरपालिकाको विशेष अनुदानबाट कुल ४ करोड रूपैयामा कालिका मावि सुन्दरपानीको पूर्वाधार निर्माण कार्य सञ्चालन भएकोमा पहिलो वर्ष – १ करोड १५ लाख, (विद्यालय भवन निर्माण) र सेरवाल, दोस्रो वर्ष – १ करोड १५ लाख (विद्यालय घेरबार , तेस्रो वर्ष/अन्तिम वर्ष – १ करोड ७० लाख (एउटा विद्यालय भवन, फर्निचर र शौचालय निर्माण साथै विद्यालय खेल मैदान लगाएत निर्माण गरिएको बताईएको छ ।
भवन उद्घाटन कार्यक्रममा नेकपा माओवादी केन्द्रका आठबिसकोट का अध्यक्ष मनिराज बटाला, नेपाली काँग्रेसका जिल्ला कार्यसमिति सचिव तारक बहादुर शाहीले शुभकामना मन्तव्य राखेका थिए । १ करोड १९ लाख रुपैयाँ लागतमा बनेको साढे दुई तलाको भवन सिवर्ड इन्जिनियरिङ कन्ट्रक्सन प्रालीले सम्झौता अवधिमै निर्माण गरेको हो । आज एक समारोहका बिच भवन उद्घाटन कार्यक्रमको सभाअध्यक्षता विव्यस अध्यक्ष कर्ण बहादुर बटालाले गरेका थिए । भने सञ्चालक प्रधानाध्यापक जय बहादुर बटालाले गरेका थिए।
