प्रधानमन्त्री ज्यू।
तपाइको औपचारिक शब्दहरू भन्दा
यो माटोको मौनता धेरै बोलिरहेको
सुन्नुभयो कहिल्यै ?
जहाँ रगतका थोपाहरू
इतिहास बनेर अझै सुगन्धित छन्।
शहीदका ती अधुरा सपनाहरू
हुरीसँगै बगिरहेका छन्
र थाकेका जनताको छातीभित्र
आशाको सानो दियो जगाइरहेका छन्।
तपाईंले राहतको फेरिने श्वास
सबैमा बाँड्न नसके पनि
हेर्नुहोस् त! त्यो बलिदानको उज्यालोले
अँध्यारोलाई अझै ठाउँ दिएको छैन।
तर प्रमज्यू
एउटा विनम्र बिन्ती
शहीदका सालिकहरूमा फूल चढाउँदा
क्षणभर रोकिएर सोचिदिनुहोला
के हामीबाट ती सपनाहरूको
साँच्चै संरक्षण भएको छ त?
जसले आफ्ना प्राण राष्ट्रलाई सुम्पिए
तिनकै त्यागले रचिएको यो आकाशमुनि
तपाईं सिंहासनमा
र हामी सामान्य आसनमा बसेर
स्वतन्त्रताको स्वाद लिइरहेका छौँ।
तर…
स्वतन्त्रता केवल शब्दमा सीमित भए
इतिहासले फेरि आँखा उठाउनेछ प्रमज्यू!
र फेरि बोल्नेछ यही माटो।
सम्झनुस त्यो दिन
जब न्यायको बाटो अलमलिनेछ
जब गणतन्त्रको अर्थ हराउनेछ
तब भुइँ त के
टेक्नका लागि यो माटोसमेत
हाम्रा लागि अपरिचित भइदिनेछ।
भ्रष्ट र अहङ्कारको राज्य आफै ढल्ने छ! गणतन्त्र दिवसको सम्पुर्णमा शुभकामना!!
अमृत कुमार बोहोरा (आशिर्वाद)
बिधार्थी नेता नेपालि कम्युनिष्ट पार्टी (नेकपा)
