रुकुम पश्चिममा भएको प्रतिनिधिसभा निर्वाचनको मत परिणामले लामो समयदेखि कायम रहेको जनार्दनको राजनीतिक विरासतमा ब्रेक लगाएको छ। करिब दुई दशकदेखि संसदीय राजनीतिमा प्रभाव जमाउँदै आएका जनार्दनको यात्रालाई यसपटक गोपाल शर्माले रोकेका छन्।
मतगणनाको अन्तिम परिणामअनुसार गोपाल शर्मा उल्लेख्य मतान्तरसहित विजयी बनेका छन् भने जनार्दन पराजित भएका छन्।
गोपाल शर्माले २१ हजार ६ सय ९ मत ल्याउदा जनार्दनले १४ हजार ३ सय ४६ मत ल्याएका छन् । ७ हजार २ सय ६३ मतको फराकिलो अन्तरमा जनार्दन पराजित बनेका हुन् । जनार्दन लाई एमाले र उज्यालो नेपाल पार्टीले समर्थन गरेका थिए।
लामो समयसम्म एउटै क्षेत्रमा प्रभाव कायम राखेका जनार्दनलाई यसपटक मतदाताले परिवर्तनको सन्देश दिँदै नयाँ नेतृत्व रोजेको विश्लेषण गरिएको छ।
स्थानीय मतदाताले विकास, रोजगारी र जनतासँग प्रत्यक्ष जोडिने नेतृत्वको अपेक्षासहित गोपाल शर्मालाई समर्थन गरेको नेताहरूको भनाइ छ। चुनावी अभियानका क्रममा पनि गोपालले “गाउँबाट काम लिएर सिंहदरबार जाने र समाधान खोजेर गाउँ फर्किने” प्रतिबद्धता व्यक्त गर्दै मतदातामाझ पुगेका थिए।
यो परिणामलाई रुकुम पश्चिमको राजनीतिमा महत्वपूर्ण मोडको रूपमा हेरिएको छ। लामो समयदेखि कायम रहेको जनार्दनको संसदीय यात्रामा ब्रेक लागेसँगै अब जिल्लाको राजनीतिक नेतृत्वमा नयाँ अध्याय सुरु भएको टिप्पणी गरिएको छ।
