रुकुम पश्चिममा लामो समयदेखि प्रभाव जमाउँदै आएका नेता जनार्दन शर्माको राजनीतिक विरासत यसपटकको निर्वाचनमा कमजोर बनेको छ। पछिल्लो मतगणना परिणामले उनको पकड घट्दै गएसँगै शर्माले फराकिलो मतान्तर सहित चुनाव हारेका छन् ।
मतगणनाको प्रारम्भिक नतिजा अनुसार नेपाली कम्युनिस्ट पार्टी नेकपाका उम्मेदवार गोपाल शर्माले २१ हजार ६ सय ९ मत सहित बिजयी भएका छन् ।
२०६४ यता निरन्तर चुनाव जितेका जनार्दन माओवादी पार्टी फुटाएर वैकल्पिक राजनीतिक शक्ति निर्माणका लागि प्रगतिशील लोकतान्त्रिक पार्टी प्रलोपा बाट उम्मेदवार बनेका थिए । शर्माको पक्षमा १४ हजार ३ सय ४६ मत आउँदा काँग्रेसका उम्मेदवार राजु केसीले १६ हजार ६ सय ६१ मत ल्याएका छन् ।
चार पटक सम्म जनार्दन शर्माको चुनाव कमान्डर बनेका गोपाल शर्माको पक्षमा मतदाताको आकर्षण बढ्दै गएको देखिएको छ। लामो समयसम्म एउटै नेतृत्वबाट अपेक्षित विकास नभएको भन्दै मतदाताले परिवर्तन खोजेको स्थानीय बासिन्दाहरूको भनाइ छ।
रुकुम पश्चिममा विगतका निर्वाचनहरूमा बलियो उपस्थिति देखाउँदै आएका जनार्दन यसपटक चुनौतीपूर्ण अवस्थामा देखिएका थिए ।
