मुलुकमा बदलिँदो राजनीतिक परिवेशबीच युवाहरु विच वैकल्पिक शक्ति निर्माणका लागी अर्थपूर्ण भेटवार्ताले नयाँ चर्चा जन्माएको छ। राष्ट्रिय स्वतन्त्र पार्टीका सभापति रवि लामिछाने, काठमाडौं महानगरपालिकाका मेयर बालेन शाह, उर्जा मन्त्री कुलमान घिसिङ तथा पूर्वप्रधानमन्त्री डा. बाबुराम भट्टराईबीच हिजो भएको भेटवार्तालाई भविष्यको राजनीतिक सहकार्यतर्फको संकेतका रूपमा हेरिएको छ।
भेटवार्तामा पछिल्लो समय जनतामा बढ्दो निराशा, सुशासनको अभाव, पुराना राजनीतिक दलप्रति घट्दो विश्वास र वैकल्पिक राजनीतिक शक्तिको आवश्यकता विषयमा गम्भीर छलफल भएको स्रोतले जनाएको छ। सहभागीहरूबीच “नयाँ सोच, नयाँ नेतृत्व र नयाँ शक्तिहरू एकजुट भएर अघि बढ्नुपर्ने” धारणा साझा भएको बताइएको छ।
छलफलका क्रममा पुराना राजनीतिक अभ्यासले देशलाई अगाडि लैजान नसकेको निष्कर्ष निकालिँदै अब नयाँ शक्तिहरूले मिलेर जिम्मेवारी लिनुपर्ने आवश्यकता औंल्याइएको थियो। विशेषगरी युवापुस्ताको अपेक्षा, सुशासन, पारदर्शिता, जवाफदेहिता र परिणाममुखी नेतृत्वबारे सहभागीहरूबीच समान दृष्टिकोण देखिएको छ ।
यद्यपि भेटवार्तामा सहभागी पक्षहरूबाट औपचारिक धारणा सार्वजनिक भइसकेको छैन। तर पछिल्लो समय देशभर देखिएको राजनीतिक असन्तोषको पृष्ठभूमिमा यो भेटलाई सामान्य भेटघाटभन्दा फरक रूपमा हेरिएको छ। एमाले काङ्ग्रेस विच चुनावी गठबन्धनको संकेत देखिएको बेला जेलमुक्त हुनेबित्तिकै रास्वपा सभापति रवि लामिछानेले राजनैतिक भेटघाट र छलफल लाई तिव्र पारेका छन। देशले अब पुराना अनुहार होइन, नयाँ दृष्टि र इमानदार नेतृत्व खोजिरहेको सन्देश यो भेटवार्ताले दिएको छ। यो भेट आगामी दिनमा नयाँ राजनीतिक यात्राको सुरुआत बन्छ वा केवल विचार आदान–प्रदानमै सीमित रहन्छ, त्यसको उत्तर भने समयले नै दिनेछ।
नेपाली राजनीतिमा लामो समयदेखि देखिँदै आएको निराशा, असन्तुष्टि र वैकल्पिक नेतृत्वको खोजीबीच भएको एक भेटवार्ताले नयाँ राजनीतिक बहसलाई जन्म दिएको छ। फरक पृष्ठभूमि, फरक भूमिका र फरक शैलीका चार प्रभावशाली पात्र—रवि लामिछाने, बालेन शाह, कुलमान घिसिङ र डा. बाबुराम भट्टराई एकै टेबलमा बसेर देशको भविष्यबारे छलफल गर्नु सामान्य संयोग मात्र मानिएको छैन। यो भेटलाई धेरैले नयाँ राजनीतिक ध्रुवीकरणको सम्भावित सुरुआतका रूपमा हेरेका छन्।
चुनाव नजिकिदै गर्दा चर्चामा आएका पात्रहरुको भेटघाटले देशमा हलचल आएको छ। पछिल्लो केही वर्षयता नेपाली राजनीति पुराना दल, पुराना अनुहार र दोहोरिएका एजेन्डामै घुमिरहेको आरोप खेप्दै आएको छ। भ्रष्टाचार, शक्ति दुरुपयोग, कमजोर सेवा प्रवाह र राजनीतिक अस्थिरताले आम नागरिकमा गहिरो निराशा छाएको छ। यही निराशाबीच नयाँ विकल्पको खोजी तीव्र बन्दै गएको छ। रवि लामिछाने वैकल्पिक राजनीतिका प्रतीक मानिन्छन्। बालेन शाह स्थापित राजनीतिक दल बाहिरबाट उदाएका जनप्रिय मेयर हुन्। कुलमान घिसिङ सुशासन र परिणाममुखी नेतृत्वको उदाहरणका रूपमा चिनिन्छन्। बाबुराम भट्टराई अनुभवी नेता, विचारक र पूर्वप्रधानमन्त्री हुन्, जो पछिल्लो समय पुरानो राजनीतिक संरचनामाथि खुलेर प्रश्न उठाउँदै आएका छन्।यी सबै पात्रहरू एकै स्थानमा भेटिनु आफैंमा राजनीतिक सन्देश बोकेको घटनाका रूपमा व्याख्या भइरहेको छ।
पुराना दलप्रतिको जनविश्वास किन खस्किँदै छ ? युवापुस्ताको अपेक्षा के हो ? राजनीतिक नेतृत्वले किन परिणाम दिन सकेन ? नयाँ शक्ति र नयाँ सोच मिलेर अघि बढ्ने सम्भावना कत्तिको छ ? जस्ता विषयमा यो भेटघाट र छलफलले प्रश्न उठाएको छ। यदि यी पात्रहरू साझा न्यूनतम एजेन्डामा सहमत भए भने: सुशासन,पारदर्शिता,जवाफदेहिता, सेवा प्रवाह र भ्रष्टाचार नियन्त्रण जस्ता विषयलाई केन्द्रमा राखेर नयाँ राजनीतिक धार निर्माण गरेमा परम्परागत सत्ता राजनीतिबाट आजित जनताका लागि आकर्षक विकल्प बन्न सक्छ।
आजको नेपालमा राजनीति प्रतिको सबैभन्दा ठूलो अपेक्षा युवापुस्ताबाट आएको छ। रोजगारी, अवसर, सम्मान र भविष्यको सुरक्षाका विषयमा युवाहरू निराश छन्। यही निराशालाई सम्बोधन गर्न सक्ने नेतृत्व खोजी भइरहेको बेला यो भेटवार्ता भएको छ। बालेन शाह र रवि लामिछानेप्रति युवाहरूको आकर्षण यसको उदाहरण हो। कुलमान घिसिङले कार्यकालमा देखाएको परिणाममुखी कामले “काम गरेर देखाउन सकिन्छ” भन्ने विश्वास जन्माएको थियो। बाबुराम भट्टराईले विचार र संरचनागत परिवर्तनको बहसलाई निरन्तर अगाडि बढाइरहेका छन्। यी सबै तत्व एक ठाउँमा आउनु युवापुस्ताले खोजिरहेको विकल्प हो। यदि नयाँ सोच भएका पात्रहरू मिल्न सके, नेपाली राजनीतिमा परिवर्तन असम्भव छैन।
