काठमाडौं । नानु बास्तोला ले नेपाली कांग्रेस को केन्द्रीय समिति बैठकमा पार्टीले लोकतान्त्रिक मूल्यअनुसार हार र जित दुवैलाई स्वीकार्दै गम्भीर आत्मसमिक्षा गर्नुपर्ने धारणा व्यक्त गरेकी छन् ।
बैठकमा बोल्दै बास्तोलाले लोकतन्त्रमा निर्वाचन परिणामलाई केवल जितका रूपमा मात्र नहेरी हारलाई पनि समान रूपमा स्वीकार्नुपर्ने बताइन् । “लोकतन्त्रमा कहिलेकाहीँ हारिन्छ, कहिलेकाहीँ शून्यमा पनि पुग्न सकिन्छ भन्ने यथार्थलाई आत्मसात गर्दै अघि बढ्नुपर्छ,” उनले भनिन् ।
उनले चुनावी हारको सम्पूर्ण दोष पार्टी सभापतिमाथि थोपर्नु उचित नहुने उल्लेख गर्दै विगतका कमजोरीहरूको समिक्षा अपरिहार्य रहेको बताइन् । “हामी सत्तामा हुँदा के गर्यौं, कस्ता व्यक्तिहरूलाई जिम्मेवारी दियौं, गठबन्धन सरकारमा भएका सहमतिहरू कार्यान्वयन भए कि भएनन्—यी सबै विषयमा गम्भीर समीक्षा हुनुपर्छ,” उनले जोड दिइन् ।
बास्तोलाले जनअपेक्षा, युवापुस्ताको समर्थन, पछिल्लो पुस्ताका आन्दोलन, बुद्धिजीवी तथा नागरिक समाजको धारणा जस्ता पक्षहरूलाई पनि समिक्षाको दायरामा ल्याउनुपर्ने बताइन् ।
संसदमा सिट संख्या घटे पनि देशको नेतृत्व गर्ने क्षमता अझै नेपाली कांग्रेस मै रहेको दाबी गर्दै उनले पार्टीलाई थप सशक्त बनाएर अघि बढ्नुपर्नेमा जोड दिइन् । साथै, विशेष महाधिवेशनपछि सम्पन्न निर्वाचनपश्चात अब समयमै १५औँ महाधिवेशन सम्पन्न गर्नु पार्टीको जिम्मेवारी रहेको उनले स्मरण गराइन् ।
यसै क्रममा उनले गगन कुमार थापा को राजीनामा माग्नु उचित नभएको धारणा राख्दै पार्टी नेतृत्वलाई थप आत्मबल र सहयोग आवश्यक रहेको बताइन् ।
काठमाडौं क्षेत्र नम्बर ९ की उपविजेता समेत रहेकी बास्तोलाले चुनावी परिणामलाई सहज रूपमा स्वीकार्दै आफू अझ मजबुत बनेको प्रतिक्रिया दिइन् । उनले सबै मतदाताप्रति आभार व्यक्त गर्दै प्रत्येक मतको सम्मान गर्ने प्रतिबद्धता व्यक्त गरिन् ।
