काठमाडौं ।राष्ट्रिय स्वतन्त्र पार्टी का सांसद खगेन्द्र सुनारले नेपाल प्रहरी र सशस्त्र प्रहरीविरुद्ध संसदीय समितिमा परेको उजुरीमाथि निष्पक्ष छानबिन हुनुपर्ने भन्दै गृहमन्त्री सुधन गुरुङ र सुरक्षा नेतृत्वप्रति आक्रोश व्यक्त गरेका छन्।
गृहमन्त्री गुरुङले नेपाल प्रहरीका महानिरीक्षक दानबहादुर कार्कीको पक्षमा अभिव्यक्ति दिएपछि सांसद सुनारले सामाजिक सञ्जालमार्फत कडा प्रतिक्रिया जनाएका हुन्। उनले आफूहरूले कसैमाथि कपोलकल्पित आरोप नलगाएको दाबी गर्दै समितिमा परेको उजुरीकै आधारमा आवश्यक प्रश्न उठाइएको बताएका छन्।
सुनारका अनुसार प्रहरी तथा सशस्त्र प्रहरीसँग सम्बन्धित विषयमा समितिमा उजुरी परेको र त्यसबारे आवश्यक कागजात तथा विवरण माग गरिएको छ। समितिले सम्बन्धित निकायलाई १५ दिनभित्र आवश्यक कागजात पेश गर्न निर्देशन दिएको उल्लेख गर्दै उनले छानबिन प्रक्रिया पूरा नहुँदै कसैलाई निर्दोष वा दोषी घोषणा गर्न नहुने बताएका छन्।
